137 Reading: Yawm fii Hayaati
يوم في حياتي
انهارده 27 فبراير 2023. في نفس اليوم السنة اللي فاتت كنت في مصر بحضر رحلة للفيوم. الفيوم مدينة جميلة اوي في مصر. صحيت الساعة 5 الصبح. رتبت سريري وصليت الفجر. بعدين فطرت ولبست هدومي. نزلت السوبر ماركت واشتريت سناكس للرحلة. جبت عصير وشيكولاتة واشتريت بسكوت كمان! بعد كدا طلبت اوبر عشان يوصلني لمحطة الاتوبيس. قابلت اصحابي وضحكنا وسلمنا علي بعض. ركبنا الاتوبيس وقولنا دعاء السفر وشغلنا اغاني طول الطريق. الطريق كان طويل اوي- حوالي 4 ساعات او اكتر. محستش بالوقت خالص! لعبنا لعب كتير في الطريق زي افلام و اتوبيس كومبليت. انا كسبت اصحابي مرة وخسرت مرتين! اخدنا صور كتيررر واكلنا وضحكنا ولعبنا كتير. اتفرجنا علي الصحراء من شباك الاتوبيس وكانت تحفة!
اخيرا وصلنا كامب الفلاحة بعد حوالي 5 ساعات! الكامب كان قدام بحيرة قارون. المنظر كان تحفة والجو كان منعش وجميل. ديكور الكامب كان ميكس بين قديم وجديد وكان مليان الوان. اول ما وصلنا الكامب, اكلنا احلي فطار فلاحي. اكلنا عسل وطحينة.. جبنة قديمة ومربي وقشطة. احلي حاجة كانت الفطير المشلتت!! كاان سخن ولذيذ!
بعد الفطار ركبنا مركب في بحيرة قارون! كانت تجربة حلوة اوي اوي. بعد كدا زورنا شلالات وادي الريان. كانت جميلة بس كان فيه ناس كتير اوي ومعرفتش اخد صورة عند الشلالات!
بعد كدا روحنا اتزحلقنا على الرمل. ده احلي وقت قضيته!! وقعت كتير اوي بس كنت مبسوطة. اتفرجنا علي الغروب وشوينا مارشيملو!!
بعد كدا رجعنا الكامب تاني عشان نتغدي. اكلنا احلي فراخ مشوية و شربنا شاي زردة. اصحابي شغلوا موسيقي شرقية و غنوا و رقصوا كتير اوي و انا اتمرجحت واتصورت صور كتيييرة.
في اخر اليوم شيخ العرب ودانا لمدرسة الفخار وعملنا اشكال حلوة كتير واخدناها معانا! اتفرجنا علي الوان السما في وادي الحيتان. السما كانت جميلة اوي زي الصور اللي شوفتها علي الانترنت والفيس بوك
في اخر اليوم ركبنا الاتوبيس و ودعنا الفيوم وشيخ العرب ناصر و بدأنا رحلة الرجوع لاسكندرية. وده كان من احلى الايام في حياتي!
